КУН ҲАДИСИ

Расулуллоҳ соллаллоҳу алайҳи васалламнинг мавлолари Савбон розияллоҳу анҳудан ривоят қилинади: «Набий соллаллоҳу алайҳи васаллам: «Мен умматим учун адаштирувчи имомлар* зараридан қўрқаман», дедилар». * Одамларни турли бидъат, фисқ ва фужурга чақирувчилар. Абу Довуд ва Термизий ривоят қилганлар.

Абу Ҳурайра розияллоҳу анҳудан ривоят қилинади: «Набий соллаллоҳу алайҳи васаллам: «Ширин сўз ҳам садақадир. Намоз сари босган ҳар бир қадаминг ҳам садақадир. Йўлдан озорни олиб ташлаш ҳам садақадир», дедилар». Имом Бухорий ривоят қилганлар.

Абу Зарр розияллоҳу анҳудан ривоят қилинади: «Набий соллаллоҳу алайҳи васаллам: «Яхшиликнинг ҳеч бирини паст санама, биродарингни очиқ юз билан қарши олишни бўлса ҳам», дедилар». Имом Муслим ривоят қилган.

Амр ибн Муррадан ривоят қилинади. У саҳобалардан бўлиб, Муовия розияллоҳу анҳуга: «Мен Расулуллоҳ соллаллоҳу алайҳи васалламнинг: «Қайси бир волий ёки қози эҳтиёжманд, камбағал одамларга ҳожат эшигини ёпса, Аллоҳ таоло унга унинг эҳтиёжлари ва ҳожатлари эшигини ёпиб қўяди», деганларини эшитганман», деди. Муснади Кеший. 1-Жуз.

Абдуллоҳ ибн Абу Бакр ибн Ҳазм отасидан, отаси бобосидан, бобоси эса Набий соллаллоҳу алайҳи васалламдан бундай ривоят қилади: «Набий соллаллоҳу алайҳи васаллам: «Кимки бир беморни бориб кўрса, раҳмат ичида шўнғиб юради. Агар у беморнинг олдида ўтирса, Аллоҳнинг раҳматига ғарқ бўлади. Кейин ортга қайтса, то ўзи келган жойига етиб бормагунча, Аллоҳнинг …

Абу Умома Боҳилий розияллоҳу анҳудан ривоят қилинади: «Набий соллаллоҳу алайҳи васаллам: «Аллоҳ, Унинг фаришталари, осмонлару ер аҳли, ҳаттоки уясидаги чумоли ва балиқ ҳам одамларга яхшиликни ўргатувчига саловот айтадилар», дедилар». Имом Термизий ривоят қилганлар.

Оиша розияллоҳу анҳодан ривоят қилинади: «Набий соллаллоҳу алайҳи васаллам: «Ўликларни ҳақоратламанглар. Чунки улар ўзлари тақдим қилган нарсага етишдилар», дедилар». Имом Бухорий ривоят қилганлар.

Ибн Умар розияллоҳу анҳумодан ривоят қилинади: «Набий соллаллоҳу алайҳи васаллам: «Яхшиликларнинг энг яшхиси – бола отасининг дўстлари билан муносабат қилишидир», дедилар». Имом Муслим ривоят қилган.

Абу Ҳурайра розияллоҳу анҳудан ривоят қилинади: «Набий соллаллоҳу алайҳи васаллам: «Ким Рамазонда фарзлигига ишониб, савоб умидида рўза тутса, унинг аввалги гуноҳи кечирилади», дедилар». Бухорий ва Муслим ривоят қилганлар.

Абдуллоҳ ибн Умар розияллоҳу анҳумодан ривоят қилинади: «Набий соллаллоҳу алайҳи васаллам: «Мусулмон мусулмоннинг биродаридир. Унга зулм ҳам қилмайди, уни ташлаб ҳам қўймайди», дедилар». Бухорий ва Муслим ривоят қилганлар.