Imom Buxoriy xalqaro ilmiy-tadqiqot markazi bukhari.uz
26-sentyabr kuni Oʻzbekistondagi Islom sivilizatsiyasi markazida “Buyuk oʻtmish merosi – maʼrifatli kelajak asosi” xalqaro forumi boshlandi. Unda 20 dan ortiq mamlakatdan nufuzli ilmiy va madaniy muassasalar vakillari, jumladan, IRCICA, Jahon islom ligasi, ICESCO, TURKSOY, Oksford universiteti, Christieʼs kimoshdi savdolari uyi, Rossiya Fanlar akademiyasi Sharq qoʻlyozmalari instituti hamda milliy arxiv va kutubxonalardan 200 dan ziyod mutaxassis qatnashmoqda.
Tadbirning ilk kunida Islom sivilizatsiyasi markazining bugungi ijtimoiy-maʼnaviy hayotimizdagi oʻrni va ahamiyatini yoritish boʻyicha 10 ta shoʻba ish olib boryapti. “Islomning yoyilishi” shoʻbasida Imom Buxoriy xalqaro ilmiy-tadqiqot markazi direktori Shovosil Ziyodov moderator sifatida ishtirok etdi. Unda islom sivilizatsiyasining taraqqiyot yoʻli, madaniy merosni asrab-avaylash va uning jahon ilm-fani rivojiga qoʻshgan hissasi atroflicha muhokama qilindi.
Forum doirasida Markaz muzeyi ekspozitsiyalarini boyitish, qoʻlyozma va artefaktlarni raqamlashtirish, xalqaro hamkorlik yoʻnalishlarini kengaytirish va zamonaviy multimedia texnologiyalaridan hartomonlama unumli foydalanish masalalari koʻrib chiqilmoqda. Shuningdek, qator hamkorlik memorandumlari imzolanishi va Forum yakuniy deklaratsiyasining qabul qilinishi rejalashtirilgan.
