Imom Buxoriy xalqaro ilmiy-tadqiqot markazi bukhari.uz
Yoshlar ongida sogʻlom eʼtiqodni shakllantirish, ularni mafkuraviy tahdidlardan himoya qilish, vijdon erkinligi va diniy bagʻrikenglik tamoyillarini chuqur tushuntirish maqsadida yurtimiz boʻylab oʻtkazilayotgan targʻibot tadbirlaridan yana biri Jizzax viloyati Sharof Rashidov tumanidagi harbiy qismda tashkil etildi. Unda Imom Buxoriy xalqaro ilmiy-tadqiqot markazi ilmiy xodimi U.Muhammadiyev va Din ishlari boʻyicha qoʻmita tuman bosh mutaxassisi O.Botirov harbiy xizmatchilar bilan “Jaholatga qarshi – maʼrifat” mavzusida muloqot qildi.
Suhbatda diniy radikalizmning salbiy oqibatlari, yot gʻoyalar taʼsiriga tushib qolmaslik, turli maʼlumot va gʻoyalarga nisbatan tanqidiy yondashish, xususan, diniy mavzularda faqat rasmiy manbalarga tayanish lozimligi taʼkidlandi.
Shuningdek, “Fuqarolarning vijdon erkinligini taʼminlash va diniy sohadagi davlat siyosati konsepsiyasi”ning mazmun-mohiyati keng yoritildi. Ishtirokchilarga unda belgilab qoʻyilgan tamoyillar – diniy bagʻrikenglik, millatlararo totuvlik, davlat va din munosabatlaridagi aniq yondashuvlar hamda mutaassiblikka qarshi maʼrifat orqali kurashish mezonlari tushuntirildi.
Masʼullar harbiy xizmatchilarning maʼnaviy barqarorligi, yuksak maʼrifiy dunyoqarashi va umuminsoniy qadriyatlarga sadoqatini yanada mustahkamlash muhim vazifa ekanini taʼkidladi. Maʼnaviy-maʼrifiy mazmundagi bunday uchrashuvlar xizmat davomida yoshlarning intellektual salohiyati va ongini yuksaltirish, ularni jamiyatda faol, bilimdon va masʼuliyatli fuqaro sifatida kamol toptirishga xizmat qiladi.
