Imom Buxoriy xalqaro ilmiy-tadqiqot markazi bukhari.uz
Muhammad ibn Abu Hotim aytganlar: “Shoshda Abdulloh ibn Abu Aroba zamonlarida Abu Bakr Madiniyning: “Naysoburda Isʼhoq ibn Rohavayhning huzurlarida edik. Abu Abdulloh ham oʻsha majlisda bor edilar. Isʼhoq bir hadisni aytdilar. Unda sahobadan keyin Ato Kayxaroniy degan odam zikr qilindi. Isʼhoq: “Ey Abu Abdulloh, Kayxaron nima?” deb soʻradilar. Imom Buxoriy: “Yamandagi bir qishloq. Abu Bakr ismli kishini Muʼoviya ibn Abu Sufyon Kayxaronga joʻnatganlar. U kishi oʻsha yerda qolib ketganlari uchun shunday nisbat berilgan. Abu Bakr Kayxaronda boʻlganlarida, Ato oʻsha kishidan ikkita hadis eshitganlar”, deb javob berdilar. Isʼhoq u kishiga: “Ey Abu Abdulloh, goʻyo oʻsha yerda boʻlib turgandek gapirasiz-a”, dedilar”, – deganlarini eshitdim”.
Ibn Adiy aytganlar: “Menga Muhammad ibn Ahmad Qumiysiy aytib berdilar. U kishi Muhammad ibn Xamiravayhdan eshitganlar. U kishi Buxoriyning: “Yuz ming sahih, ikki yuz ming sahih boʻlmagan hadisni yoddan bilaman”, – deganlarini eshitganlar”.
Abu Bakr Kalvazoniy aytganlar: “Men Muhammad ibn Ismoilga tenglashadigan olimni koʻrmaganman. Olimlardan kitob olardilar. Bir marta unga qarab, hammasini yodlab olardilar”.
