Imom Buxoriy xalqaro ilmiy-tadqiqot markazi bukhari.uz
Имом Бухорий халқаро илмий-тадқиқот маркази илмий ходимлари жойларда ижтимоий-маънавий муҳитни янада яхшилаш мақсадида ўтказаётган тадбирларининг навбатдагисини Жиззах вилоятининг Ғаллаорол туманида ташкил этди.
Туман мутасаддилари ҳамкорлигида Булоқбоши ва Узунбулоқ МФЙ фаоллари билан “Жаҳолатга қарши – маърифат” ғояси асосида “Ислом – тинчлик ва эзгулик дини” мавзусида маънавий-маърифий суҳбат ўтказилиб, диний ва ахлоқий қадриятларнинг устувор аҳамияти, исломнинг инсонпарварлик ғоялари ҳақида сўз юритилди. Инсон ҳуқуқларини, таълим-тарбиянинг узвийлигини, тинчлик ва барқарорликни таъминлашда ҳар бир шахс муҳим ўрин тутиши таъкидланди.
Тарғибот тадбирлари доирасида маҳалладаги кексалар, ижтимоий ҳимояга муҳтожлар ва ногиронлар ҳолидан ҳам хабар олинди.
Тумандаги 32-умумтаълим мактаби ўқувчилари билан алоҳида учрашув ташкил этилиб, ёшларга маънавий камолотга етишиш, соғлом турмуш тарзига одатланиш ва турли мафкуравий хуружлардан ҳимояланиш чоралари борасида тушунча ва кўникмалар берилди.
