Қорақалпоғистондаги тадбирлар қамрови ошмоқда

27 февраль куни Имом Бухорий халқаро илмий-тадқиқот маркази, Ислом цивилизацияси маркази, Имом Мотуридий халқаро илмий-тадқиқот маркази ва Имом Термизий халқаро илмий-тадқиқот марказининг Қорақалпоғистонда иш олиб бораётган тарғибот гуруҳи томонидан Қўнғирот, Мўйноқ, Қонликўл ва Шуманай туманлари раҳбар ходимлари ва жамоатчилиги вакиллари иштирокида тадбир ташкил этилди.

Ижтимоий соҳа вакиллари, давлат ташкилотларининг жойлардаги бўлимлари мутасаддилари, маҳалла раислари, ҳудудлардаги ҳоким ёрдамчилари, маҳалла хотин-қизлар фаоллари, диний соҳа олимлари, мактабгача таълим муассасалари мудирлари, умумтаълим мактаб директорлари ва уларнинг маънавий-маърифий ишлар бўйича ўринбосарлари қатнашган тадбирда аллома аждодларимиз эга бўлган юксак илмий салоҳият, уларнинг улуғ маънавий сийрати ва буюк инсоний фазилатлари ҳақида сўз борди.

Тарғиботчилар “Буюк алломаларимиз илмий меросида юксак инсонпарварлик ғоялари тараннуми”, “Ёшларимизни ёт оқимларнинг бузғунчи ғояларидан ҳимоя қилиш” ва “Янги Ўзбекистонда диний-маърифий соҳада амалга оширилаётган ислоҳотлар” мавзуларида маърузалар қилди.

Шунингдек, “Жаҳолатга қарши маърифат – асосий мақсадимиз” номли фильм намойиш қилиниб, марказлар томонидан нашр этилган янги китоб ва рисолалар тақдимоти ташкил этилди.