МУҲАММАД ИБН ИСМОИЛ БИЛМАЙДИГАН ҲАДИС ҲАДИС ЭМАС…

   Муҳаммад ибн Абу Ҳотим айтганлар: «Имом Бухорийнинг: “Амр ибн Али Фаллоснинг шогирдлари мен билан бир ҳадис устида тортишдилар. Мен: “Унақа ҳадисни билмайман”, – дедим. Улар: “Бухорийнинг ҳам билмайдиган ҳадислари бор экан-да”, – деб хурсанд бўлиб, Амрнинг олдига бориб бу ҳақда хабар берганларида, у киши: “Муҳаммад ибн Исмоил билмайдиган ҳадис ҳадис эмас”, – дебдилар”, – деганларини эшитдим».

   Муҳаммад ибн Абу Ҳотим айтганлар: «Ҳошид ибн Абдуллоҳга Абу Мусъаб Зуҳрий айтганлар: “Бизнинг наздимизда Аҳмад ибн Ҳанбалдан кўра Муҳаммад ибн Исмоил фақиҳроқ ва ҳадисда билимдонроқдир”. Шунда у кишига: “Ҳаддан ошириб юбордингиз”, – дейилди.  Абу Мусъаб бу гапни айтган кишига қараб: “Агар сен имом Моликни кўрганингда, унинг ва Бухорийнинг юзларига қараб, икковлари фиқҳ ва ҳадисда тенг деган бўлардинг”, – деб жавоб бердилар».

   Муҳаммад ибн Абу Ҳотим айтганлар: «Ҳошид ибн Исмоилдан эшитдим. У киши Исҳоқ ибн Роҳавайҳнинг: “Бухорийнинг ҳадисларини ёзинглар. Агар Ҳасан Басрий замонларида шу йигит бўлганларида ҳам, одамлар Бухорийнинг ҳадис ва фиқҳий илмига муҳтож бўлишарди”, – деганларини эшитганлар».