Home / YANGILIKLAR / Turkiyadan munosabat: «O‘zbekiston – borib ko‘rish shart bo‘lgan o‘lka»

Turkiyadan munosabat: «O‘zbekiston – borib ko‘rish shart bo‘lgan o‘lka»

Turkiyadagi ommabop elektron nashrdan biri – “haberakdeniz.com.” saytida o‘zbek diasporasining faol vakili, professor Salih Aynuralning  «O‘zbekiston – borib ko‘rish shart bo‘lgan o‘lka» sarlavhali maqolasi eʼlon qilindi, deb xabar bermoqda “Dunyo” AA muxbiri.

 Materialda mamlakatimizning boy tarixiy merosi, turizm salohiyati, muqaddas islom dini bilan bog‘liq qadamjolari va bugungi zamonaviy rivojlanishi batafsil qalamga olingan.

Maqolada taʼkidlanishicha, qadim madaniyatlar chorrahasi bo‘lgan O‘zbekiston Markaziy Osiyoning barcha davlatlari bilan umumiy chegaradosh.

«O‘zbekiston tarixiy, madaniy meʼrosi jihatidan Markaziy Osiyo davlatlari orasida  eng boy mamlakatdir, – deb yozadi muallif. – Ayniqsa, Samarqand, Buxoro, Xiva va Shahrisabz osmon ostidagi ochiq shahar-muzeylar sifatida eʼtirof etiladi. Bu shaharlarda bo‘lsangiz, ko‘chalarida kezsangiz o‘zingizni tarixga tushib qolgandek his qilasiz. Tasavvur qiling, Samarqandni aylanib yurib, maktabda o‘rganganlaringiz, kitoblardan o‘qib hayratlangan Ulug‘bekning rasadxonasiga duch kelasiz. U damda o‘zingizni fazo qaʼrida his qilasiz. «Ziji jadidi Ko‘ragoniy» jadvalidagi 1018 ta yulduzga sayohat qilgandek tassavvur qilasiz».

 Nashrda butun hayoti davomida bir marta ham yengilmagan, qudratli davlat barpo etgan Sohibqiron Amir Temur haqida alohida maʼlumotlar o‘rin olgan. «Samarqandga borganingizda Amir Temur  maqbarasini, Mirzo Ulug‘bek, Tillakori va Sherdor madrasalarini albatta tomosha qiling. Dunyo ilmiga ulkan hissa qo‘shgan va O‘zbekistonda tug‘ilgan Beruniy, Xorazmiy, Ibn Sino, Farg‘oniy, Ulug‘bek va Ali Qushchidek mutafakkir olimlar bilan ayni havodan nafas olgandek bo‘lasiz», – deya qayd etiladi materialda.

“Samarqandga borganda turkiy xalqlar ilm va tafakkurga qanchalik ahamiyat bergani va olimlarni ne chog‘li eʼzozlaganini yurakdan shohid his qilasiz.

Buyuk allomalar Imom Buxoriy, Moturidiy, Termiziy, Bahouddin Naqshbandiy va Xo‘ja Ubaydulloh Ahror hazratlarining maqbaralari yoki Qusam Ibn Abbosning qabrlari joylashgan Shohi Zinda ansamblini ziyorat kilsangiz o‘zingizni xuddi ilohiy olamda his qilasiz. Shuning uchun, O‘zbekiston faqatgina Turkiya xalqining emas, butun islom olamining borib ko‘rishi kerak bo‘lgan mamlakat sifatida ahamiyatlidir”, – deb taʼkidlaydi muallif.

«Buxoroda Minorai Kalon, Chor minor, Ark qalʼasi, Somoniylar maqbarasi, Mir Arab, Nodir Devonbegi, Abdulazizxon madrasalari joylashgan. Xivadagi Ichan qalʼa, Islomxo‘ja minorasi va Kalta minor, Muhammad Aminxon va Sherg‘ozixon madrasalari, qadimiy Juma masjidi majmuasi, Qo‘xna ark qalʼasida esa ertaklar olamining nafasini tuyasiz», – deb yozadi turk olimi.

Maqolada yozilishicha, poytaxt Toshkentga kelganingizda zamonaviylik va tarixni o‘zaro uyg‘unlashganini ko‘rasiz. Toshkent o‘zining keng yo‘llari, yam-yashil bog‘lari va ko‘rkam binolari bilan Turkiya uchun naʼmuna bo‘la oladigan shahardir.

«Qisqasi, O‘zbekiston biz uchun tabiat go‘zalliklari, tarixiy va madaniy boyligi hamda mushtarak qadriyatlari nuqtai nazaridan borib ko‘rilishi kerak bo‘lgan o‘lkalarning avvalida turadi. O‘zbekistonga borganingizda o‘zingizni zinhor begona his qilmaysiz», – deb yozadi Salih Aynural.

Maqolaning to‘liq shakli bilan https://www.haberakdeniz.com.tr/haber-mutlaka-gorulmesi-gereken-kardes-ulke-ozbekistan-53818.html havolasi orqali tanishish mumkin.

Check Also

Hashar uyushqoqlik bilan oʻtdi

Xalqimizga xos goʻzal urf-odat, anʼana va qadriyatlarimiz orasida hashar birdamlik, hamjihatlik ramzini ifodalaydi. U tufayli …