Imom Buxoriy xalqaro ilmiy-tadqiqot markazi bukhari.uz
11-noyabr kuni Imom Buxoriy xalqaro ilmiy-tadqiqot markazida “Oʻzbekiston kasaba uyushmalari kuni” va mamlakatimizda kasaba uyushmalari harakatining 120-yilligi munosabati bilan bayramona tadbir boʻlib oʻtdi.
Dastlab, sogʻlom turmush tarzini keng targʻib etish va jamoa oʻrtasida sport muhitini rivojlantirish maqsadida shaxmat, shashka va stol tennisi boʻyicha musobaqalar oʻtkazildi. Ikki kun davom etgan bellashuvlarda erkaklar va ayollar alohida yoʻnalishlarda ishtirok etib, oʻz mahoratlarini namoyish etdi.
Markazda oʻtgan bayram tadbirida Markaz direktori Shovosil Ziyodov va boshlangʻich kasaba uyushmasi raisi Yoʻldoshxon Isayev ishtirokchilarni ushbu qutlugʻ sana bilan tabriklab, kasaba uyushmalari tizimida amalga oshirilayotgan ishlar, xodimlarning mehnat sharoiti va ijtimoiy himoyasini taʼminlash, shuningdek, jamoada sogʻlom muhitni shakllantirish borasida soʻz yuritdi.
Tadbir yakunida sport musobaqalari gʻoliblarini taqdirlash marosimi boʻlib oʻtdi. Faol ishtirokchilar boshlangʻich kasaba uyushmasi tomonidan sovrinlar va esdalik tuhfalari bilan taqdirlandi. Shuningdek, boquvchisini yoʻqotgan oilalarga moddiy yordam koʻrsatildi.
Tantanadan soʻng mehmonlar va xodimlar uchun bayram dasturxoni tashkil etildi.
