Imom Buxoriy xalqaro ilmiy-tadqiqot markazi bukhari.uz
Yurtimizda fuqarolarning vijdon erkinligini mustahkamlash, diniy sohani sogʻlom va barqaror asosda rivojlantirish mamlakatimiz ijtimoiy-siyosiy hayotining ustuvor yoʻnalishlaridan biriga aylangan. Bu borada amalga oshirilayotgan islohotlar, qabul qilinayotgan hujjatlar va ularning hayotdagi amaliy ifodasi koʻp millatli va konfessiyali Oʻzbekiston aholisining turli qatlamlari uchun keng imkoniyat va qulayliklar yaratmoqda.
Aynan shu maqsadda yaqinda qabul qilingan Oʻzbekiston Respublikasida fuqarolarning vijdon erkinligini taʼminlash va diniy sohadagi davlat siyosati konsepsiyasi mamlakatda din va davlat munosabatlarini yangi, demokratik va maʼrifiy asosda yoʻlga qoʻyishga xizmat qilmoqda.
Konsepsiya mazmun-mohiyatidan maʼlumki, uning asosiy vazifasi vijdon erkinligi kafolatlarini mustahkamlash, diniy tashkilotlar faoliyatini qonun doirasida muvofiqlashtirish, jamiyatda bagʻrikenglik, dinlararo hamjihatlikni saqlash, ayniqsa, yoshlar ongida maʼrifiy immunitetni kuchaytirishdan iborat.
Bu hujjatga koʻra, diniy taʼlimning vijdon erkinligiga taalluqli asoslari davlat tomonidan mustahkamlanmoqda, shuningdek, bunday muassasalarda taʼlim sifatiga, kadrlar tayyorlash jarayoniga alohida eʼtibor qaratilmoqda.
Bu siyosatning hayotdagi ifodasini turli maʼnaviy-maʼrifiy tadbirlarda, jumladan, kitob koʻrgazmalari, ilm-fan merosiga bagʻishlangan uchrashuv va muhokamalarda ham koʻrish mumkin. Jumladan, Imom Buxoriy xalqaro ilmiy-tadqiqot markazi tashabbusi bilan tashkil etilgan “Ajdodlar merosi — maʼnaviyat va maʼrifat manbai” mavzusidagi koʻrgazmada ham hamyurtlarimizning diniy taʼlimga qiziqishi, kitob orqali maʼnaviyatni boyitishga intilishi konsepsiyada belgilangan maqsadlarga mos tarzda roʻyobga chiqayotgani taʼkidlandi.
Unda qayd etilganidek, bugungi kunda davlat siyosatining markazida inson huquqlari, xususan, ijtimoiy barqarorlik va shaxsiy eʼtiqod erkinligining taʼminlanishi turadi. Zero, vijdon erkinligi – har bir fuqaroning tabiiy huquqi boʻlib, u nafaqat diniy sohada, balki umumiy maʼnaviy muhitda ham tenglik va osoyishtalikni kafolatlaydi.
Shu jihatdan olganda, mazkur Konsepsiya nafaqat huquqiy asos, balki maʼnaviy yoʻllanma sifatida ham keng jamoatchilik, xususan, yoshlar orasida maʼrifiy harakatlarning poydevoriga aylanmoqda. Bu esa milliy va diniy merosni asrab-avaylash, ilm va maʼrifatni yuksaltirish yoʻlidagi har bir tashabbusning mustahkam tayanchi boʻlib xizmat qilmoqda.
