Imom Buxoriy xalqaro ilmiy-tadqiqot markazi bukhari.uz
Muhammad aytganlar: “Muhammad ibn Ismoilning: “Basraga borganimda Bundorning ilm halqalarida qatnashdim. Koʻzlari menga tushganda: “Yigit qayerdanlar?” – deb soʻradilar. “Buxoro ahlidanman”, – dedim. “Abu Abdullohni qanday qilib tashlab kelolding?!” – dedilar. Jim turdim. Shunda kimdir: “Alloh sizga rahmatini yogʻdirsin, shu kishi – Abu Abdullohning oʻzlari”, dedi. Oʻrinlaridan turib, qoʻlimdan ushlab quchoqladilar. Soʻngra: “Necha yillardan buyon faxrlanib yurganim, xush kelibsiz!” – dedilar”, – deganlarini eshitdim”.
Muhammad aytganlar: “Homid ibn Ismoildan eshitdim. U kishi Muhammad ibn Bashshorning: “Basraga birodarimiz Abu Abdullohdek hadis bilimdoni kelgani yoʻq”, – deb, Imom Buxoriy ketmoqchi boʻlganlarida xayrlasha turib: “Ey Abu Abdulloh, bundan keyin uchrashmasak, uchrashadigan joyimiz – mahshargoh boʻlsin”, – deganlarini eshitganlar”.
Hofiz Abu Quraysh Muhammad ibn Jumʼa aytganlar: “Muhammad ibn Bashshorning: “Dunyoda mukammal hadis bilimdonlari toʻrtta: Rayda Abu Zurʼa, Samarqandda Dorimiy, Buxoroda Muhammad ibn Ismoil, Naysoburda Muslim”, – deganlarini eshitdim”.
